The Flying Stars - Stellingwarfs Kabberet

Hoe begon et allemaol?

Et begon allemaol in de winter van 1947.

Tiedens een klubaovend van de korfbalvereniging traden een aantal jongelu veur et voetlocht mit schetsen en meziek. Men raekte hierdeur zo enthousiast dat d'r wodde besleuten een meziekvereniging op te richten, mit o.a. accordeons, gitaren ,mandolines enz.

Hiel vaeke wodde d'r praot over een naeme veur disse vereniging. Uuteindelik wodde keuzen veur "The Flying Stars" Indertied was et arg in om een engelse naeme te gebruken.

De vereniging gruuide in die jaoren uut tot 40/50 leden. In de jaoren 1960 / 70 kwam de meziek in et slop. Vule leden haokten of wegens huwelik of wark argens aanders. Toen ok nog de dirigent plotseling kwam te overlieden, wodde d'r op eigen krachten nog ienige jaoren deur hobbelt. Doe kwam al gauw de vraoge, wat now..........

De koppen wodden bi'j mekaer steuken. Daor de liefde veur et teniel niet te bedwingen was, besleut men om veerder te gaon as cabaretgroep.

D'r wodt een pergramma brocht in de streektael. Hierdeur nemt de groep now een eigen plaets in.

Elk jaor slaegt men d'r weer in een ni'j pergramma te brengen, mit schetsies, ofwisseld mit lieties, [soms in et Nederlaans] en dan meestal mit een lach en soms mit een traon.

De groep bestaot op dit moment uut 11 personen. Men beschikt over eigen decors, belochting en geluud.

D'r wodt optreden veur allerhaande verenigingen, die een gezellige aovond willen organiseren.